សេង សូណា ត្រូវប៉ាន់ជាមួយតារាបរទេស

សេង សូណា បានបង្ហាញពីក្តីត្រេកអរជាខ្លាំងក្នុងពេលដែលរូបនាងត្រូវបានជ្រើសរើសឲ្យសម្តែងជាមួយតារាហូលីវូដ ព្រោះឃើញថាសមតាមបំណងប្រាថ្នារបស់នាងហើយ ។ មួយរយៈមុននេះ តារាសម្តែងមានដើមទ្រូងសិចស៊ី សេង សូណា ដែលហាក់ស្ងប់ស្ងាត់ឱកាសក្នុងការថតភាពយន្តបានឲ្យដឹងថា ពេលនេះនាងសប្បាយចិត្តជាខ្លាំងដែលបានសម្រេចបំណងព្រោះមានឱកាសក្នុងការសំដែងភាពយន្តវិញហើយ ដោយក្នុងនោះបានសំដែងប៉ះនឹងតួប្រុសមកពីប៉ែកអឺរ៉ុប ។

សេង សូណា បានបកស្រាយថា «ពេលនេះខ្ញុំបានសម្រេចមហិច្ឆតាខ្ញុំហើយ ដែលបានថតជាមួយតួហូលីវូដល្បីៗមកពីអាមេរិក ដែលតួប្រុសទាំងនោះរូបសង្ហាហើយសុទ្ធតែតួល្បីៗទៀតផង» ។ ប៉ុន្តែនាងក៏បានអះអាងថា «រឿងដែលខ្ញុំសម្តែងថ្មីនេះ មិនមែនជាភាពយន្តបែបស្រើបស្រាលនោះទេ ហើយបើទោះជារឿងបែបនោះក៏ខ្ញុំមិនទទួលថតដែរ យ៉ាងណាខ្ញុំជាកូនខ្មែរ គោរពប្រពៃណីខ្មែរដែរ ។ ភាពយន្តនោះ ជាភាពយន្តដែលក្នុងសាច់រឿងលើកឡើងអំពីសេដ្ឋីបរទេស ក្រោយពីធ្វើដំណើរកម្សាន្តជុំវិញពិភពលោក លុះមកដល់ស្រុកខ្មែរ ជួបគ្រោះលិចកប៉ាល់ ទើបបានជួបស្នេហាជាមួយតួអង្គខ្ញុំ ដែលសម្តែងក្នុងរឿងជាសង្សាររបស់តួឯកជនជាតិបរទេសនោះ» ។ សេង សូណា ធ្លាប់បានបង្ហាញមហិច្ឆតាលើអាជីពសិល្បៈខ្លួនថា «បើជ្រុលឈ្មោះជាតារាសិចស៊ី បើមានឱកាសថតជាមួយកុនហូលីវូដ ទោះជារឿងបែបស្រើបស្រាលក៏មិនញញើតដែរ» ។ តែពេលនេះបើទោះបានសម្តែងជាមួយតួប្រុសបរទេសទាំងបីនាក់ ហើយក៏ជាតួល្បីៗមកពីអាមេរិក ក៏រឿងស្នេហាក្រៅឆាកនាងមិនអាចទទួលយកបានឡើយ ។ ទោះយ៉ាងណា នាងក៏ទទួលស្គាល់ដែរថា «ព្រោះតែទើបមានឱកាសសម្តែងជាមួយតួហូលីវូដ ទើបនាងមិនហ៊ានឈប់ដើម្បីធ្វើខួបកំណើតដែរព្រោះថ្ងៃចេញថតដំបូងចំថ្ងៃខួបកំណើត សុខចិត្តមិនធ្វើកម្មវិធីខួបនោះទេ គឺលុបចោល ដើម្បីរក្សាឱកាសមាសនេះ ៕